Entrevista a Ricardo Ruibal

Esta é a entrevista que lle fixeron as nosas compañeiras Raquel Astray, Julia Carrasco e Michelle Patiño a Ricardo Ruibal, ao noso mestre de Ed. Física. Esta entrevista entregouna a nosa titora para a revista Retrincos, pero como non sabemos se a van elexir ou non, decidimos publicala no blog. Así chegará a máis xente e será como unha pequena homenaxe AO NOSO RICHI, que para o próximo curso xa non estará connosco.

¡MOITA SORTE, AMIGO RICHI!

¡BOTARÉMOSTE DE MENOS!

A xente de 5º A do curso 2007-2008

A nosa experiencia coa pizarra dixital

Na aula de 3º A estivemos traballando coa pizarra dixital durante este curso e fixemos un artigo sobre esta experiencia para a publicación escolar Retrincos. Aquí vos deixamos as nosas impresións sobre este recurso educativo:

Isabel Torrente Seco (titora de 3º A)

Simulacro de incendio

O pasado día 9 de maio tivo lugar no noso centro un simulacro de evacuación por incendio, que incluía o rescate dun mestre que quedara atrapado nas dependencias da escola.

A rapidez da actuación dos bombeiros de Ordes e a prontitude da evacuación dos máis de 400 alumnos fixeron da actividade todo un éxito. Os nenos aprenderon o que deberían facer nunha situación destas características e disfrutaron ao mesmo tempo vendo como os bombeiros acudían no rescate do seu mestre de educación física, Ricardo Ruibal, ao que máis de un neno lle preguntou polo seu estado unha vez rematado o simulacro. A experiencia estivo coordinada polas docentes Paz Robado, Sandra Fraga e Maribel Graña. Foi valorada por todos os participantes como moi positiva e servirá para estar máis preparados ante un caso real.

Podedes ver a noticia na edición dixital de La voz de Galicia.

Uns agradecementos moi especiais:

Maribel, Sandra e Paz, como coordinadoras do simulacro e máis das visitas ao Parque de bombeiros, queremos amosar o noso agradecemento:

• Ao claustro de profesores/as, polo súa implicación e participación.
• Ao Sr. Manolo, o noso conserxe, pola colaboración en todo momento e o traballo realizado nos meses previos ao simulacro.
• Ao profe Ricardo, por presentarse voluntario dende o principio, sen saber aínda a que lle esperaba.
• Ao Xefe de Servizo do Parque Comarcal de Bombeiros, D. Mauricio Calvo Vidal, pola súa dispoñibilidade, axuda, colaboración, etc, etc...
• Aos bombeiros, pola amabilidade e paciencia amosadas con todos os nenos e nenas nas diferentes visitas ao parque, e pola impresionante intervención no simulacro.
• Á Policía Local, Protección Civil, prensa e demais efectivos que participaron.

As coordinadoras

Entrevista a Fina Casalderrey

No primeiro trimestre deste curso os alumnos e alumnas do 3º ciclo de educación primaria traballamos na aula coa fermosa novela de Fina Casalderrey A lagoa das nenas mudas. Como colofón a esta gratificante actividade tivemos a inmensa sorte de contar coa presenza da autora.

Contounos moitas cousas interesantes e respondeunos a todas cantas preguntas lle fixemos. Aquí vos deixamos a entrevista para que poidades disfrutar tanto coma nós:

Mercedes Figueira (coordinadora do 3º ciclo de EP)

Contacontos

O martes 13 de maio, coincidindo coa Semana das Letras Galegas, tivemos unha visita especial no C.E.I.P Castelao. Celso Fernández Sanmartín, poeta e contador de contos para todas as idades, estivo con todo o alumnado: desde educación infantil ata o terceiro ciclo de educación primaria. Foi un tempo de contos e tamén de cancións, onde houbo momentos de quedar coa boca aberta prendid@s na emoción do que escoitabamos, momentos de escachar a rir e momentos de nos sorprender con desenlaces inesperados. Celso encantounos a tod@s, profes e nen@s, coa maxia dos contos e a maxia dun bo contador de historias.

Teresa Ramil Basanta (coordinadora do ENDL)

Letras Galegas 2008

Xa se achega o Día das Letras Galegas, que este ano, como ben sabedes, adícase a Xosé María Álvarez Blázquez. Dende a aula de 3º A facémoslle a nosa particular homenaxe con este mural que realizamos entre todas e todos e no que incluímos este poema que escribiu para a súa filla Colorín:

Vinde todos ollar á miña nena:

vai co escriño de millo prás galiñas,

i as condanadas, véndoa tan pequena,

encírrana con bulras e rapiñas.

O galo mandarín chégalle ao peito

-ollos de vidro, crista de sandía

e na fachenda do pescozo ergueito

cruces e bandas de outa fidalguía-.

A galiña pedresa que nunca pon

é a que máis cacarexa; o malandrín

do pito novo faise o valentón.

e todos andan tras meu «Colorín»...

Ela non pode máis e berra: ¡Non!,

tira co escriño e vén chorando a min.

Xosé María Álvarez Blázquez

Roseira do teu mencer

Isabel Torrente Seco (titora de 3º A)

Peliverdes!

Os nenos e nenas de 3º C fixemos uns "cespiños" na clase. Primeiro enchemos de terra uns saquiños e botámoslles unhas sementes de céspede. Atámolos e colocámolos preto da ventá da clase para que lles dera o sol. Todos os días, antes de marchar para a casa, os regamos e o quinto día apareceron as primeiras plantas. Cando a herba comezou a medrar cosímoslles dous botóns, para facerlles uns ollos, e unha boca. Colocámolos sobre un vaso de iogur, peinámolos e decorámolos. Agora só nos queda cortarlles o pelo de cando en vez aos nosos simpáticos "Peliverdes"!

Adela Seoane (titora de 3º C)

Visita ao parque de bombeiros de Ordes

Os nenos e nenas de 3º fomos de visita ao Parque de Bombeiros de Ordes. Alí, uns bombeiros moi simpáticos ensináronnos en que consiste o seu traballo e amosáronnos as instalacións do parque. Estivemos na sala de comunicacións onde reciben os avisos e no ximnasio onde entrenan. Tamén probamos os seus traxes e cascos, montamos nos camións e fixemos soar a sirena. En definitiva, non só aprendemos moitas cousas senón que tamén o pasamos en grande e, como fin de festa, rematamos pasados por auga.

Isabel Torrente Seco (titora de 3º A)

Noraboa aos gañadores!

Mostra dos traballos presentados ao concurso

Rematado o concurso de cartel e lema convocado polo equipo de Normalización e Dinamización Lingüística, fixemos unha mostra no centro con todos os carteis participantes.